السلام عليكم ورحمة الله وبركاته ..

انا من قبل ما اتزوج انا مسجله في هذا المنتدى وكنت أقرا كثير في مواضيع المقبلين على الزواج واستفدت منهم كثير ..

والحين بعد ما تزوجت دخلت هذا القسم ومررررة مرررة استفدت .. وبعض الاحيان ادخل وادعي لصاحب /ــة المشكلة ان ربي يفرج عنه يارب ..

..

انا الحمدلله حياتي مستقرة ومر عليها سنة وزيادة ولله الحمد .. وحنا عايشين بسعادة الحمدلله ..

لكن ..

من الاشياء اللي منغصة علينا حياتنا .. ((غيرة زوجي الشديدة)) بعض الاحيان احس انه يغار على اشياء ما اتوقع انه يغار عليها ..

حتى هو يعترف يقول انا غيرتي شديدة .. وحتى خواته يقولون مرة مرة غيور ..

انا افرح اذا كان يغار علي بعباءتي ودايما يقول لي غطي عيونك ومررررة افرح اذا قال .. وصرت اغطيها بدون ما يقول ..

لكن غيرته بالأشياء الثانية مرررة ما تعجبني ..

مثلا .. انا قبل ما اتزوج كنت اجلس مع اهلي اذا كان فيه زوج اختي .. يعني اكون متغطية مررررة ما يبان مني شي .. ويسلم علي (كلام طبعا) وأرد عليه .. ويسأل عن الحال وأقول الحمدلله .. وبعدها أكون كأني صنم .. يعني بس أسولف مع أمي وأختي وبس ما أسولف معاه ..

لكن بعد الزواج يقول لي زوجي لا تردين عليه ولا شي .. حتى لو سلّم لا تردين ..

ويقول لي ان حياتهم وتقاليدهم هم كذا .. يعني ما يجلسون مع بعض ابدا .. يعني اذا صار فيه حرمة وحدة غريبة بين الحريم تتغطى عن واحد من الرجال ينفصصلون عن بعض ..

اما مجتمعنا حنا عادي .. يعني عادي اخوي يدخل عند خالاتي لو فيه بنت خالتي بينهم موجودة .. يعني هي تكون موجودة وتتغطى عنه .. وهو ولا يشوفها ولا كأنها موجودة .. بس يسولف مع خالاتي وأمي وجدتي ..

ولما أتناقش أنا واياه عن هذي المشكلة يقولي واقول له اننا احنا عادي .. يقول احنا مو عادي ...

ومرة جاء طاري عن هالسالفة في عند أهل زوجي وأنا طبعا شاركت بالنقاش وتكلمت عن مجتمعنا وانه عادي يعني .. قالوا حتى احنا عادي ..

انا استغربت يعني زوجي ما يبغاني اجلس مع اهلي اذا كان بينهم رجال مثل زوج اختي خاصة انه كثيييير الحضور والخروج معنا في رحلاتنا البرية ووو .. وزوجي اذا ما طلع معانا في يوم من اليوم يبغى يمنعني من الخروج ويقول لي اجلسي بالبيت احسن من انك تروحين معهم ويضيق صدري .. اقول له طيب تعال معنا يقول ما اقدر خاصة ان طلعات اهلي تكون مفاجئة .. فيصير زوج اختي مو مرتبط بشي وزوجي مرتبط ..

انا صرت اسمع كلام زوجي حتى بعدم وجوده .. ما ارد السلام الا بصوت وااااطي عشان الواجب يعني ..
لكن اذا رجعت للبيت زوجي تكون نفسيته مررررة مو حلوة .. يوقل غصب عني يضيق صدري .. اقول والله ما سويت شي ولا تكلمت ولا شي .. يقول والله واثق فيك لكن غصب عني ..

..

ومرة كان زوجي مسافر .. وكنت انا عند اهلي .. وقررت اختي انها تطلعنا لمنتزة طبعا زوجها معها .. وكلمت زوجي واستأذنت منه .. وبوقت ما كنت بالمنتزة كلم علي زوجي .. وجلس يسأل عن الاحوال وكذا .. وسمع صوت زوج اختي انهى المكالمة بشكل عااادي وبدون ما احس انه ضايق صدرة او شي ..

وبعدها ارسل رسالة يقول (ماشا الله جالسة معاه) .. وييييين يبغاني اجلس بالله .. اجلس مع الخدامة يعني .. انا جالسة جنب اختي وامي وهو بعيد عني بآخر البساط ..



ويعلم الله اني كرهت الطلعات والروحات والجيات .. وكل ما راح هو يسافر يكلمني عن هذي القضية .. وهو مرررة متحسس من زوج اختي .. يعني اكثر مشاكلنا بسبب غيرة زوجي منه ..

..
وكل ما ناقشته يقول والله غصب عني لا تلوميني ..

انا مررة متضايقة من غيرته الشديدة علي .. عطوني الحل تكفون .. انا احب زوجي وما ابغى هذي الصفة تكرهني فيه ..

.. تحياتي لكم ..

__________________

انتي امشي معاه ع الخطوه وضايقيه بعدها بيقول لك وش فيك قولي له ابيك تحس باحساسي وانهي المشكله

السلام عليكم ..

والله يا اختي معك حق في مسألة طلبه منك بعدم رد السلام ...

يعني اذا الوحدة ردت السلام على زوج اختها بطريقة رسمية جداً و سأل عن الحال و جاوبته الحمد لله وما ضحكت و ما قعدت تمزح ، مافيها مشكلة !!!

هذه الامور موجودة في أغلب المجتمعات و الرسول عليه الصلاة و السلام كانت أم هانئ تلقي عليه السلام و هو كان يرد علييها !!!

تقول أم هانئ:
ذهبت إلى رسول الله صلى الله عليه وسلم عام الفتح فوجدته يغتسل وفاطمة ابنته تستره فسلمت عليه فقال ( من هذه ). فقلت أنا أم هانئ بنت أبي طالب فقال ( مرحبا بأم هانئ ). فلما فرغ من غسله قام فصلى ثماني ركعات ملتحفا في ثوب واحد فلما انصرف قلت يا رسول الله زعم ابن أمي أنه قاتل رجلا قد أجرته فلان بن هبيرة فقال رسول الله صلى الله عليه وسلم ( قد أجرنا من أجرت يا أم هانئ ). قالت أم هانئ وذاك ضحى. صحيح البخاري [ جزء 5 - صفحة 2280 ]

يعني الأمر من الناحية الشرعيه مافيه مشكلة بالسلام الكلامي بدون الخضوع بالقول ...

الغيرة على العرض ممتازة جداً ...

ولكن كل شيئ يزيد عن حده ، ينقلب ضده !!!

والزايد أخو الناقص .. مثل ما بيقولوا !!!

وخير الأمور أوسطها ..

وبالنسبة للحل .. ان شاء الله الأخوة و الأخوات من اصحاب الخبرة يقدموا لكِ الفائدة و يحاولون المساعدة ..

وان شاء الله ربنا يسهل و يديم حياتكم بخير وسعادة ...

بالتوفيق ...

واليوم زوجي بالطريق عائدا من الحج الى مدينة غير المدينة اللي أنا فيها .. يعني أبعد منها بكم كيلو ..

يعني ان شا الله بكرا راح يكون عندي بإذن الله ..

كلمته قال احنا بالطريق وبعدين انقطع الارسال من عنده .. ارسلت له (توصلون بالسلامة سلملي على اللي عندك وبين قوسين على الحريم طبعا ) انا امزح معاه وابغاه يفرفش ..

ارسل لي (اكيد ابسلم لك على الحريم بس بدون ماتكتبين اللي بين القوسين لاني انا طبيعتي كذا)

انا ارسلت له (ما احب هذا الاسلوب لأني انا جالسة امزح معاك لا تقلب المزح جد)

قال انا منكد وضايق صدري ووووو .. طيب انا وش ذنبي ..

ياربي ابغى اصيح انا ..

__________________

الحمد لله المغتربين خلصانين من هلهم

بكره يجو الاطفال وعندها يتوزع الحب بينكم

الله يكون في العون
اقعدي معو وفهميه شو اللي بتحبيه وشو اللي بتكرهيه
معل هي السنوات الاولى فيها شوية مشاكل ربنا يعينك

وجهة نظري للموضوع ..

غيرة زوجك طبيعية جداً وليس هناك مايُقلل في الموضوع

غيرته دليل على حبة لكِ وحرصه عليك

أتمنى أنك ماتعطي الموضوع أكبر من حجمة وتبعدين عن الاشياء

اللي تنرفزه وخصوصا المواضيع الحساسه له شخصياً

أتمنى لكم التوفيق .. وحياة سعيدة

السلام عليكم
حاولي أختي تمشي معاه خطوة بخطوة
قللي من الخروج بنزهات مع اختك و زوجها

واحرصي على خروج زوجك معكم

و إذا لم يتمكن , طالبيه بنزهة خاصة بينكم مقابل عدم خروجك مع أختك

يعمي أطيعيه و بما أن هذا الشي يضايقه احرصي انك تبعدي عن كل مايضايقه

الله يوفقك


تحياتي
ام فاطمة

ــــــــــــــــــــــــــــــــــــــــ

زوجك غيرته طبيعية وأحمدي ربك أن زوجك يغار عليك وهذا دليل على محبته لك

لأن من علامات المحبة والغلى هو الغيرة ، وأنا أجزم أنا كثير من النساء تحب أن يكون زوجها غيورا عليها ((ولا أقصد الشكاك لأن الشك مرض)) أما الغيرة فهي محمودة وملح الحياة الزوجية

بل أن الزوج يحب أن تغار عليه زوجته وإذا لم تغار عليه ملها وقال في نفسه زوجتي ماتحبني

--العلاج أقول أن زوجك معه حق فزوج أختك حمو ، ولقد حذرنا النبي صلى الله عليه وسلم من الحمو فقال: الحمو الموت

والحمو يشمل أقارب الزوج مثل الاخ والعم والخال وابن العم ،،كذلك يشمل زوج الأخت

فنصيحتي أبتعدي بالمرررة عن الجلوس في مجلس فيه زوج أختك ، وأحذري أن تسلمي عليه ولا تردي عليه السلام
وإذا دخل عليكم في المجلس فقومي وأتركي المجلس له طاعة لله فطاعة الزوج من طاعة الله

ولازم تتقيدين بعادات زوجك التي لاتتنافي مع الشرع

وفقك الله وسدد خطاك

__________________

	لادار للمرء بعد الموت يسكنها**إلا التي كان قبل الموت بانيها فاءن بناهابخيرطاب ساكنها**وإن بناهابشرخاب بانيها وأعمل لدارالبقاء رضوان خازنها**الجار أحمد والرحمن بانيها أرض لها ذهب والمسك طينتها**والزعفران حشيش نابت فيها